Este proxecto ten como eixo vertebrador unha publicación homónima, coordinada por Uqui Permui e Marta Lucio, que recorre este lugar onde o mar entra co seu sinuoso perfil e provoca un hábitat especial para a reprodución de determinados peixes e mariscos, e un microclima propio para a terra: as Rías Baixas. Un territorio cunha determinada forma de entender e crear a gastronomía.

O libro introdúcenos por medio de entrevistas, realizadas polos escritores Manuel Gago e Jorge Guitián, na cociña de nove prestixiosos cociñeiros: Alberto González de Silabario, Rafa Centeno de Maruja Limón, Iñaki Bretal e Roberto Filgueira de Eirado da Leña, Pablo Romero de Allo e Aceite, Pepe Solla, Xosé T. Cannas de Pepe Vieira, Yayo Daporta, Antonio Botana de Pandemonium e Javier Olleros de Culler de Pau, que nos falan dos seus procesos creativos.

Os nove cociñeiros detallan ademais vinteseis receitas fotografadas por Francesc Guillamet. Un libro de autor, perfecto para aqueles que queiran, non só descubrir, senón saborear este lugar. Rías Baixas. Territorio Gastronómico recibiu o Gourmand CookBook Award na súa edición española na modalidade de cociña local, optando ao premio internacional do mesmo que se fallará en París en marzo deste ano.

En 1989, preto de cen mulleres, catro delas en folga de fame, pecháronse na fábrica de Odosa, na Illa de Arousa, como protesta ao peche inminente da fábrica de conservas. Mentres estiveron pechadas gravaron un documental contando o que estaba sucedendo. A partir dese material, realicei este novo documental que narra a historia contada polas mesmas protagonistas, mesturando pasado co presente.

Longametraxe documental dirixida por Uqui Permui, gravada durante o 2009 e 2010. Co apoio da Agadic.

Proxeccións:

2012

Santiago de Compostela | Mércores 1 de febreiro | 21.30 h | Cineclube de Compostela
 

2011

A Coruña | 18 de marzo | Casa-Museo de Emilia Pardo Bazán
(Estrea)

Santiago de Compostela | Xoves 31 de marzo | 19.30 h | CSC do Ensanche
(Organiza Andaina. Revista de pensamento feminista)

A Coruña | Xoves 7 de abril | 10.30 h | Facultade de Socioloxía
(Ciclo de cine documental "Unha ollada ao social galego")

Illa de Arousa | Domingo 17 de abril
(Presentación)

Cabeceira para a serie documental “Ao fío do retrato”, producida por Ibisa TV para a TVG. Cada programa presenta un personaxe da vida social e cultural de Galicia a través de retratos e conversas co fotógrafo Anxo Cabada. Para a realización da cabeceira partiuse de fotografía fixa sobre a que vai desenvolvendo a gráfica, guiada por un novelo que tamén se converte en texto. A música orixinal é de Rodrigo Romaní.

O Premio Auditorio de Galicia para Novos Artistas, que este ano celebrou a súa sexta edición, é xa un referente para os creadores emerxentes galegos. Para o catálogo desta edición propúxose un novo formato: un DVD multimedia que inclúe toda a información das pezas e artistas seleccionados, así como unha visita virtual á exposición a través da súa gravación en vídeo. O catálogo recolle tamén o rexistro das instalacións específicas, textos explicativos dos autores sobre a súa obra, traxectorias e outras creacións anteriores.